انتحار الكاتبة الهولندية الشهيرة من أصل مغربي، نعيمة البزّاز وخلاّت جوج وليدات

نعيمة من مواليد منطقة تيغسالين نواحي خنيفرة سنة 1974، هاجرات مع واليديها لهولندا وهي عندها ربع سنين، عاشت فأمستردام لسنوات، و بدات الكتابة بالهولندية وهي فسن صغيرة، 21 سنة.
هاد الكاتبة المعروفة بزاف فهولندا غا يوقعوا ليها مشاكل بسبب الكتابات الجريئة ديالها على الدين والجنس و المخدرات، وتعرّضات لتهديدات بالقتل منذ سنة 2006 بسبب رواية كتباتها على رجال الدين اللّحايا فهولندا، إضطرات توّقف بسبابها على الكتابة وتدخل سوق راسها، هادشي خّلاها تدخل فحالة إكتئاب شديدة منذ سنة 2007 و تقطع علاقتها مع المحيط القريب ديالها و معارفها فالساحة ديال الكتابة و الأدب.
رجعات فسنة 2010 برواية جديدة  سميتها نساء فينيكس (فينيكس حي معروف فأمستردام) كتحكي فيها على عائلة مُهاجرة جات عاشت فداك الحي وكتعاود فيها على العنصرية والحقد والكراهية اللي شافتها هاد العائلة من الجيران الهولنديين.شي حدّ من جيران نعيمة الحقيقيين وصلاتو الرواية وقراها وحساب لو راه كتعاود عليه، هزّ قنبلة مولوتوف ومشا عندها للدار باغي يقتلها، اللّي خلاّه ليها بولحية ف 2006 كمّلو ليها الهولندي.
من بعد سنوات ديال العلاج النفسي والعذاب اليومي، نعيمة البزّاز وضعات حدّ لهاد المعاناة صباح أمس الجمعة وقرّرات تطلّع الجينيريك ديال حياتها وتودّعنا في صمت.